رسائل شوق

 

رسائل شوق

رسالة رقم 1

عزيزتى أحلام 

اليوم، صحوت من نومى على رنة التليفون، كنت على يقين أنك من يتصل.. لذلك رسمت بسمة كبيرة على وجهى، وأدخلت كمَّ من الحب إلى صوتى، ورفعت السماعة.. 

لم أسمع صوتا فى الجهة المقابلة، فقط صمت طويل ثم أغلق الخط.. لم أحاول معاودة الاتصال بالرقم، فقط ذهبت سعيدا إلى الثلاجة.. أخرجت زجاجة مياه باردة وحاولت بها إطفاء شوقى إليكِ.. لولا أن قلبى –الذى تسكنيه- لا تصل إليه المياه لرأيتِ بعينيك كيف تصاعد البخار من داخلى مع كل دفقة ماء من الزجاجة كانت تعبر إلى فمى.. أعرف أنكِ تحلمين مثلى بهذا اللقاء، وأنكِ تصنعين مثلى البخار كلما تذكرتِ أيامنا معا.. انتظر اتصالك القادم بشوق لا تطفئه مياه العالم.

محبتى والسلام

ترويض الكلب

ترويض الكلب

كلاب الشارع - وإللي أنا عارفهم بالاسم- كانت النهاردا زايدة كلب جديد.. أنا حاولت أتعرف عليه لكنه كان شرّانى جدا كإنه ماشافش بني آدمين قبل كدا.. كل ما أحاول أمد إيدي ناحيته  يزوم ويحاول يعضني...

***

صحيت النهاردا على أخبار فتح النار على المصلين في المسجد الأقصى.. أنا غسلت وشي بسرعة ووقفت في البلاكونة مستني بتاعة الجرايد لما تعدي علشان أشتري جرنان.. كانت كل كلاب الشارع -وإللي أنا عارفهم بالاسم- قاعدة تلعب مع بعض ، لكن الكلب الجديد كان واقف لوحده في نهاية الشارع وقاعد يهوهو على كل واحد فايت وبيحاول يعضه.. الناس إللي متعودة على كلاب الشارع دا– وإللي أنا عارفهم بالاسم -  كانت مندهشة إحنا ليه سيبينه مادام شرّانى كدا!!؟

**

بالليل وقبل ما أنام... اطمنت من آخر نشرات الأخبار إن المساعي السلمية بتجري علشان يعم الهدوء المنطقة من جديد بعد  المذبحة، ونمت وأنا بحلم بالهدوء مخيم على بيتنا، لكن الساعة 3 بعد نص الليل أنا صحيت مفزوع.. كان الكلب الجديد واقف تحت البلاكونة بتاعتي وقاعد يهوهو.. قمت بصيت.. كل شئ طبيعي.. 

"بيهوهو على إيه ابن المجنونة دا".. حدفته بطوبة جرى واستخبى جنب البيت لكن فضل يهوهو، دخلت وقفلت البلاكونة وحاولت أنام لكن صوت نباحه كان واصل لوداني وقلقني.... 

فين ع الصبح ساب بلاكونتي وراح يهوهو في حتة تانية.. ماكانش ممكن أنام لأن ميعاد الشغل جه لكن أنا قررت بعد إللى حصل طول الليل إني أروض الكلب دا علشان على الأقل يبقى زى أى كلب من كلاب الشارع – وإللي انا عارفهم بالاسم -..

**

الجزار إللي فاتح في شارعنا وإللي طول عمر علاقتي بيه محصورة  في "صباح الخير".... "صباح النور".. بس.. استعجب جدا لما لقاني داخل عليه الدكان وبصبح وحلف طلاق ثلاثة لازم أشرب حاجة، لكن لما سمع طلبي لفه من غير كلام وسابني مشيت.. 

بالليل أنا ربطت العظمة بحبل ونزلتها م البلاكونة.. شافها جرى عليها.. رفعتها قدامه لكن ماكانش ممكن يطولها.. قعد يشب وينط بيحاول يمسكها وفي كل مرة يفشل يزيد سُعاره وجنانه فيشب أكثر وينط أكثر... لما اطمنت للموقف دخلت وقفلت البلاكونة ونمت..

الصبح أول ما صحيت م النوم.. كانت نشرة الأخبار بتأكد إن الوضع مشتعل في القدس وقطاع غزة والضفة الغربية.. فتحت البلاكونة.. كان نايم بيبص للعظمة.. سحبت الحبل ودخلت غسلت وشّي ورحت الشغل. 

**

واحد صاحبي قاللي.. "إن حكاية العظم ده ماتنفعش وإن – أنت -  كل ما هتديله عظمة أو تحسسه إنه ممكن ياخدها هيطمع في غيرها وإن ماقدرش في الآخر يأخد منك عظم هياكلك أنت.. فكر كويس الحل إنك تعمل على إنك تمشيه م الشارع... أو ... تقتله..... " 

وأنا راجع م الشغل كان قاعد ما بيهوهوش لكن بص لي وسابني عديت 

بالليل أنا نزلت العظمة زى إمبارح بالظبط وسبته ودخلت نمت... 

**

الصبح رفعت العظمة... كان واقف جنب الحيط وباصص لى.. غسلت وشّي ورحت الشغل... صاحبي قاللي.. "إللي بتعمله دا خطر جدا... أكيد الكلب دا في الآخر هياكلك. لازم تبعده عن شارعكم وإلا...." 

وأنا راجع م الشغل مشى ورايا.. مديت.. وهو الآخر.. جريت.. جرى... كان على وشك إنه يحصلني لما وصلت لباب الشقة.. دخلت وقفلت ورايا.. فضل واقف ع الباب.. قلت شوية ويزهق فيمشي وبدأت أمارس روتين حياتي العادي..

كلت وشربت وسمعت نشرة الأخبار إللي أكدت إن الجيش الإسرائيلي فرض طوق أمني حول مناطق الحكم الذاتي.. أنا بصيت ع الكلب، كان لسه قاعد على باب الشقة.. "يا ترى بيفكر في إيه؟"... جبت العظمة م البلاكونة ورمتها قدامه في الشارع.. جرى جاب العظمة وقعد بيها على باب الشقة...

بالليل وقبل ما أنام... قفلت الباب بالترباس وسمعت الراديو.. كان الحصار لسه مفروض.. طفيت النور ونمت... بالليل والأوضة بتشغي ضلمة.. أنا حسيت بحركة في باب الشقة.. قمت بالراحة أبص.. كان فاتح باب الشقة وجى على أوضة النوم... "أعمل إيه..؟"... جريت دخلت البلاكونة وقفلت علىّ.. دخل الأوضة... بيشمشم.. بيزق دلفة الشيش... أنا مالقتش قدامي إلا الحبل إللي كنت رابط فيه العظمة... أنا لفيت الحبل حوالين وسطي ونطيت م البلاكونة.. متعلق أنا في النص  بالضبط.... 

" الحـ قـ و نــ ى..............."

يوم ظهور الملائكة

 يوم ظهور الملائكة

قصة قصيرة 

كل شئ حولنا كان يشير إلى أننا سوف نصبح ملائكة، الحجرة التى أبيضت جدرانها بفضل ضوء الشمس الذى لم يكن يصل إليها من قبل بسبب الستارة القاتمة التى كانت تغطيها وحياتى، السرير الذى غطته الملاءة البيضاء التى تحتل وسطها وردة حمراء محاطة بأوراق خضراء يانعة كأنها تشرب من ماء انهار الجنة.. كانت المرة الأولى التى تُقبّلنى  وأُقبّل فيها امرأة على الاطلاق.. لا يمكن لهذه القبلة وهذه اللحظة أن تمحى من الذاكرة، مهما عبرت من فوقها نساء، ومهما سقطت من الذاكرة الأماكن والاسماء والحوادث.. تظل هى.. علامة، منارة نهتدى بها فى ظلمات الليل ووحشة السرير بعد الفراق.. 

لكن وقتها وهى تتخلى عن القطعة الأخيرة من ثيابها، وهى فى منتصف الحجرة تدور فتقطع شعاع الشمس تحلله لألوان الطيف السبعة.. فيظهر الأحمر من خلالها نارا ونورا.. تنجذب له فراشات الحب والعشق والشهوة.. تقترب فتهتز الأرض تحتها، تتخلى عن كرويتها وتصير منبسطة كأنها أرض الأساطير والديانات القديمة.. وقتها.. تأكدت أننا سوف نصبح ملائكة.. نطير وندخل الجنان.

أغنية طائر

 أغنية طائر

قصة قصيرة

عرض عليه بائع العصافير عصفورا صغيرا، كان يردد – بشكل دائم-  أغنية وحيدة مليئة بالنشاز، تتحدث عن طائر غادر عشه ذات صباح على أن  يعود لعشه - كما هى عادته - فى نهاية اليوم.. لكنه لم يعد.. انتظره فى العش – أياما كثيرة-  عصفور صغير كان مايزال بيضة حين فارقه ولم يعد.. لذلك خرج من البيضة ولم يجد من يردد على مسامعه أغانى العصافير الصغيرة، ليحفظها بدوره ويرددها ككل عصافير الغابة.. فتعود أن يسمع أصوات الطبيعة ويقلدها.. فجعل نفسه رعدا، وهسيس ريح، وخرير ماء، ونقيق ضفدع وعواء ذئب ونقرات مطر على أوراق شجر... حتى ملت الطيور أفعاله وأصواته فطردته حتى أخر حدود الدنيا/ الغابة، وهناك عاش وحيدا يردد أغنيته الوحيدة الحزينة عن الطائر الذى خرج.. حتى ألقته الأيام فى شبكة الصياد، فأتى به – لبائع العصافير- فى قفص حديد ليزيد لحنه حزنا يتشربه السامعون رغم النشاز.

عقوق

  عقوق

قصة قصيرة جدا

لإنها مسمعتش كلام أمها من صغرها، واتعودت ترمى كل أحلامها الكبيرة والقديمة من دولابها، صابها الخرس لما قابلته، انسحبت لأوضتها ساكتة.. فتحت دولابها تدور عليه فى أحلامها المتعلقة، ملقتهوش ولا لقت قصة حبهم، اللى كانت متأكدة إنها عاشتها فى حلم قديم زى فيلم سيما أبيض وأسود.

مقدمة تاريخية

 

مقدمة تاريخية

قصة قصيرة جدا

الصالة التى كانت تزهو بالألوان صارت قاتمة، والساعة التى كانت تملأ البيت حركة وضوضاء ماتت ودفنت على الجدار.. كل شئ أصابته القتامة.. حتى هو الذى اعتاد أن يفتح شباكه كل صباح لتدخل إليه حرارة الشمس وأنغام الطيور ونسمات الهواء المغمسة بالندى.. انعكست فجأة صورته على مرآته، ثم على حائطه والأثاث شبحا لشيخ مهدم.. فصار غير قادر على الحركة وسط هذا الزحام الخانق من الصور والتزم الفراش.

ليلى والبنات الثانية

 ليلى والبنات الثانية

قصة قصيرة 

إيه الفرق بين ليلى وأي بنت ثانية ..؟

كل ما أفتح قلبي علشان أصفي مية حزنه ألقى ليلى جواه ماسكه الجردل وبتنزح المية.. أبوسها وأضمها لصدري ونقعد سوى لحد مية القلب ما تنشف.. ساعتها أقفل عليها قلبي وأبدأ أمارس حياتي.. عمري في يوم مافتحت قلبي لقيت أي بنت تانية بتنزح أو حتى بتساهم في نزح المية.. طول الوقت البنات الثانية إللي بتلعب في حدايق قلبي وتدوس برجليها خضرته.. وإللي قاعدة تسرح شعرها جدايل تشنقني بيها وإللي قاعدة تتزوق علشان تشاغل مراية قلبي فتحرمني الشوف.. كل دا كان صحيح جميل وكان ساعات كثير  بيسعدني، لكن قد إيه أنا كنت بحب ليلى لما أشوف التعب المرسوم على وشها، والهدوم إللي بتشر مية وتجيب البرد وهى لامسة الجسم الرقيق دا وبتهزه بعنف، يخليني أحاول أدفيها بأي طريقة فمالقاش قدامي حل غير إني أقلع هدومي وأخلع عن ليلى هدومها المبلولة وأضمها لصدري فتدفا وأوصل أنا للفرق الحقيقي بين ليلى وأي بنت تانية....

                                 *                   *                        *

      صوتها... صوتها لما باسمعه باحس كإن  الشيخ رفعت بيأذن لفطور رمضان... صوت بيخليني أحس إنى ملاك سابح في بحر فضي من النور مش نور عادي لا.. نور رباني مانقدرش نشوفه ولا نحس به ألا بقلبنا... صوت بتقعد مستنيه بشوق جعان للقمة ولهفة عطشان لبق مية.. 

دا الفرق بين ليلى إللي بترفعني بصوتها للسما فاشبع وأرتوي والبنات الثانية إللي بيشدني صوتهم لحجرة مقفولة الأبواب وضوء أحمر وسرير واسع.. واسع... عمري ما شبعت منه ولا بل ريقي...

                             *                        *                       *

..... شعرها.... شعرها ليل.... مش زى أي ليل لكن زى أحلى ليل... ليل مافهوش قمر ولا بتلعب فيه نجوم لكن أسود.. أسود لدرجة إن ريحته تديك الإحساس دا فتنعشك زى هوا البحر المتغمس باليود وتسيبك أنت تنام وتحلم بإنك بترسم على الشاشة السودا ده خطوط وردي... آه... لما شفايفي لمست الشعر دا... مت واندفنت واتحسبت ودخلت الجنة...

هو دا الفرق بين ليلى إللي شعرها بينجيني من حساب الأخرة وأي بنت ثانية من إللي شعرهم بيقيد في قلبي نار جهنم. 

                              *                     *                        *

.....جسمها... جسمها شجرة البان إللي واقفة على عمودين من المرمر بيقربوا من بعض لحد ما تفضل بينهم يا دوب فتحة صغيرة جدا زى الثقب الأسود أو هى فعلا ثقب أسود جاذبيته تشد وتحطم أي جسم يقرب منه أو يحاول يعبره .. لكن أكيد إللي يقدر يعبره من غير ما يتحطم هيعيش في عالم جديد بزمن جديد واحاسيس جديدة عمر ما انسان قدر يعيشها أو حتى يمكن يتصور وجودها...

هو دا الفرق بين ليلى النجم الكبير إللي جمع كل جاذبيته في ثقب صغير جدا... لكن خطير جدا.. مدمر جدا.. يجذب له ويحطم أكبر وأقوى الكائنات وبين أي بنت ثانية مجرد قمر أو كوكب أو شمس مجال الجاذبية عندها محدود وممكن حسابه. 

                             *                   *                         *

ليلى نار... تحس جواها بالبرد والسلام أما أي بنت ثانية جنة.. شهوات مش ممكن تنتهي ومش ممكن تشبع كل شهواتي...